Wednesday, December 5, 2007

رباعيات فنان



ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي !!!


يا قرص شمس ما لهش قبة سما
يا ورد من غير أرض شب و نما
يا أي معني جميل سمعنا عليه
الخلق ليه عايشين حياه مؤلمة
عجبي !!!


يا طير يا عالي في الســــــما طظ فيك
ما تفتكرشي ربنا مصطــــــــــــــــفيك
برضـــــــــــك بتاكل دود و للطين تعًًًًودً
تمـــــــــص فيه يا حلو .. و يمص فيك
عجبي !!!



كيف شفت قلبي و النبي يا طبيــــــــــــب
همد و مات و الا سامع له دبيـــــــــــــب
قاللي لقيته مختنق بالدمـــــــــــــــــــــوع
و ما لوش دوا غير لمسه من إيد حبيب
عجبي !!!!


بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي !!!


إيديا في جيوبي وقلبي طــــــــرب
سارح في غربة بس مش مغترب
و حدي لكين ونسان و ماشي كده
وبابتعد ما اعرف .. أو باقـــــترب
عجبي !!


غمست سنك في السواد يا قلـــــــــــــــم
عشان ما تكتب شعر يقطر ألــــــــــــــــم
مالك جرالك إيه يا مجنون ... و ليــــــــه
رسمت ورده وبيت و قلب و علـــــــــــم
عجبي !!!


غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك ....تـقع
عجبي !!!


يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي !!


يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمــــــــــا
كتم الغنا هو اللي ح يموتــــــــك
عجبي !!!


عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبي !!!


أنا قلبي كوكب و انطلق في المدار
حواليكي يا محبوبتي يا نور ونـــار
يلف مهمــــا يلف ما بيكتـــــــفيش
وتمللي نصه ليل و نصه نهــــــــار
عجبي !!


يا خالق الكون بالحساب و الجبر
و خالقني ماشي بلختيار و الجبر
كل اللي حيلتي زمزمية أمـــــــل
وازاي تكفيني لباب القــــــــــــبر؟
عجبي !!

16 comments:

rack-yourminds said...

السلام عليكم

صلاح جاهين شاعر كبير ياما امتعنا بكلماته الجميله

كلمات جميله بجد واختيار موفق

تحياتي لكي

shabfa2re said...

رائع

Rushdy Kamel said...

محدش يقدر يختلف على العبقرية الفريدة دي

تحياتي

YHYيــوســف الـمصـرى said...

السلام عليكم ورحمة الله وبركاته
..........................
ازيك يا بيرو ؟ فينك يا بنتى مش باينة ليه ؟

أحب أعيش ولو أعيش في الغابات
أصحي كما ولدتني أمي وأبات
طائر حيوان حشرة بشر بس أعيش
ما أحلى الحياة حتى في هيئة نبات
عجبى !!!!

تحياتى

شريف طلال said...

يااااااه
هو فيه زى صلاح جاهين
شكراً للرباعيات العبقريه دى

ماء تشرين said...

على الرغم من انى مبحبش شعر العاميه بس انا حتى اقل منى انى اعلق على الاحساس العالى والمعنى الجميل مع تحياتى

Doba said...

بصراحة
بصراحة

عبقرى
برغم اختلاف الزمان لكن كلماته تنفع اى وقت وقوية ومعبرة للغاية

تسلم الاختيارات
تحياتى
هبة

أخف دم said...

ازيك يا بيرو
كل سنة وانتى طيبة
كنت جاى على اساس انى ألقى حاجة ليكى أعلق عليها
بس لقيت حاجة تانية لصلاح جاهين بس اللى يشفع لك انى مغلطتيش لما حطيتى احاجات دى
أحسنت اختيار اللى تحطيه واحيانا حسن الاختيار بيبقى احسن من الكتابة نفسها
كل سنة وانتى طيبة مرة تانية وان شاء الله فى زياراتى الجاية ألاقى عندك كل جميل منك ومن غيرك

Anonymous said...

كل سنه وانتم طيبين
وحبيت أعزمكم على حفل افتتاح دار الكتب بتاعت صاحب البوابه , زميلنا البلوجرى الفظيع
ودا هايكون يوم الخميس 10 يناير الساعه 6 مساءا فى مكتبة البلد , 31 شارع محمد محمود بالتحرير
عاوزين تواجد مكثف هناك
مستنيينكواااااااااااا

momken said...

الله بقالى كتير مطالعتش الرباعيات
فكرتينى باول مره اقراها كنت بندهش اوى بكل راباعيه
لكن لما قريتها هندك استمتعت اوى

تحياتى

Abd-Alrahman said...

اية الكلام الكبير دة
اية العبقرية دي
بجد بجد مش عارف اكتب اية ولا اقول اية في الي قدامي
من الكلمات مايعجز قلمك عن وصفها
مدونتك كمان مدونة جميلة جدا جدا
في غاية الهدوء دي كانت اول زيارة ليها

شبــ اون لاين ـــاب said...

بيروو

احنا محتاجين رايك فى موضعنا الجديد
و معلش اذا احنا قصرنا فى الزيارات لكن بجد غصب عننا

مستنينك

beroo said...
This comment has been removed by the author.
rack-yourminds said...

غايبه يعني اتمني يكون المانع خير

تحياتي وسلامي

Ahmed EIssa said...

هي الرباعيات حلوة حقيقة جدا
بس ده مش مبرر تسييبيها فيق الشهرين..انتي حتمتحنينا فيها ولا ايه؟؟؟

Khaled Samer said...

برجاء زيارة منتدى احلى حب

http://www.a7la7ob.eb2a.com/vb/